ने.सं. ११३७ कौलागा द्वादसि सोमवाःया | २०७४ आश्विन ३०, सोमबार १८:१९:३६

‘न्हूदँया भिंतुना हलिमय् नेवाः ब्याके’ नारा थ्वयेकाः नेवाः अर्गनाइजेशन अफ अमेरिकाया ग्वसालय् ने.सं. ११३७ कौलागा द्वादसि (अक्टोबर १६) सोमवाःया दिं न्हूदँ ने.सं. ११३८ या लसताय् भिंतुना कालबिल व न्हूदँया भिंतुना हलिमय नेवाः ब्याके  खँल्हाबल्हा व विचाः आदान प्रदान ज्याझ्वः जुल ।

येँया चागलय् च्वंगु जगतसुन्दर ब्वनेकुथिइ जूगु उगु ज्याझ्वलय् मूपाहाँ कथं वाङमय शताब्दी पुरुष लिसें संस्कृतिविद् डा. सत्यमोहन जोशी झायादीगु खः ।

ज्याझ्वलय् न्हापांगु ब्व कथं न्हूदँया भिंतुना कालबिल ज्याझ्वः जूगु खः । उगु ज्याझ्वलय् पंचकन्यापिन्सं पाहाँपिन्सं लसकुस याःगु याःगु खःसा मूपाहाँ जोशीपाखें त्वादेवाय् मत च्याका उलेज्या यानादीगु खः ।

ज्याझ्वलय् नेवाः अर्गनाइजेशन अफ अमेरिकाया नेपाः कजि किरण केन रंजितं लसकुस न्वचू बियादीगु खःसा काशिनाथ तमोट, लक्ष्मीदास मानन्धर, माया मानन्धर, प्रा.डा. चुन्दा बज्राचार्य, जनकवि दुर्गालाल श्रेष्ठ, वाङमय शताब्दी पुरुष डा. सत्यमोहन जोशीलिसें नेवाः अर्गनाइजेशन अफ अमेरिकाया न्हापांम्ह न्वकू पुष्कर विक्रम प्रजापतिपिन्सं थःथःगु नुगःखँ तयादीगु खः ।

उगु ज्याझ्वलय् नेवाः अर्गनाइजेशन अफ अमेरिकापाखें ज्याझ्वलय् झायादीपिं पाहाँपिनिगु म्हसीका नं न्ह्यब्वःगु खःसा निगूगु ब्व कथं न्हूदँया भिंतुना हलिमय नेवाः ब्याके खँल्हाबल्हा व विचाः कालबिल ज्याझ्वः जूगु खः ।

ज्याझ्वलय् पुष्कर विक्रम प्रजापतिं नेवाः अर्गनाइजेशन अफ अमेरिकाया म्हसीका व गतिविधि न्ह्यब्वयादीगु खः ।

अथेहे काशिनाथ तमोटं नेपाल संवतया ऐतिहासिक मौलिकताया विषयस नुगःखँ तयादीगु खःसा वाङमय शताब्दी पुरुष डा. सत्यमोहन जोशीं न्हूदँया भिंतुना  हलिमय नेवाः ब्याकेया विषयस नुगः खँ तयादीगु खः ।
ज्याझ्वलय् न्ह्यसः लिसः नं जूगु खःसा थःथवय् विचाः कालबिल नं जूगु खः ।

(किपाः राकेश महर्जन)

Source:http://www.newaonlinenews.com

Please follow and like us:
0

November 15th, 2017

Posted In: News


Our Supporters